Неадкладна вызваліць «дзеля выратаваньня яе жыцьця» палітзьняволеную Вікторыю Кульшу заклікалі 20 траўня незалежныя экспэрты, якіх прызначыла Рада правоў чалавека ААН, перадае «Позірк».
«Спадарыня Кульша ўжо пэўны час знаходзіцца ў стане, які пагражае жыцьцю. Паводле апошніх паведамленьняў, з канца красавіка яна трымае бестэрміновае галадаваньне. Мы сурʼёзна занепакоеныя станам яе здароўя і вельмі асьцерагаемся за яе жыцьцё. Неабходна тэрмінова вызваліць яе, каб гарантаваць яе бясьпеку», — заявілі экспэрты.
ГЛЯДЗІЦЕ ТАКСАМА: 206 беларускіх палітвязьняў — у стане асаблівай рызыкі з прычыны хваробаў, узросту, інваліднасьціПерасьлед Вікторыі Кульшы
Інжынэрку аховы працы Вікторыю Кульшу затрымалі 4 лістапада 2020 году за тое, што яна адміністравала тэлеграм-канал і чат «Кіроўцы 97%». Яе абвінавацілі ў «актыўным удзеле ў дзеяньнях, якія груба парушаюць грамадзкі парадак» (ч. 1 і 2 арт. 342 КК). У лютым 2021-га Вікторыю асудзілі на два з паловай гады калёніі.
Пазьней Вікторыю Кульшу тройчы асудзілі за непадпарадкаваньне адміністрацыі калёніі (ч. 1 арт. 411 КК) — агулам на тры дадатковыя гады, якія яна правяла ўжо ў калёніі для паўторна асуджаных жанчын у Зарэччы (Рэчыцкі раён).
Сёлета ў красавіку Вікторыя Кульша мела выйсьці на волю, але яе перавялі ў гомельскі СІЗА-3 ужо ў чацьвёртай справе паводле таго ж артыкулу 411.
У зьняволеньні яе ня раз каралі штрафным ізалятарам і трыманьнем у ПКТ (памяшканьні камэрнага тыпу).
Паводле праваабаронцаў, у зарачанскай калёніі адзін з наглядчыкаў душыў Вікторыю локцем, стоячы ззаду, а таксама цягаў яе па камэры.
Праз галадоўкі ў яе ўзьніклі праблемы са здароўем, двойчы здараўся сардэчны прыступ.
ГЛЯДЗІЦЕ ТАКСАМА: «Палітвязень — увесь беларускі народ». Вызваленая з турмы Паліна Шарэнда-Панасюк дала прэс-канфэрэнцыю ў Вільні. ВІДЭАЭкспэрты лічаць паўторныя суды паводле аднаго і таго ж артыкулу недапушчальнымі
Яны зьвяртаюць увагу на тое, што забарона другі раз судзіць і караць за тое самае злачынства ўпісаная ў Міжнародны пакт аб грамадзянскіх і палітычных правах, які Беларусь ратыфікавала яшчэ ў 1973 годзе.
«Мы атрымалі мноства паведамленьняў пра шырока распаўсюджанае жорсткае, бесчалавечнае і прыніжальнае абыходжаньне са зьняволенымі ў жаночых папраўчых калёніях у Беларусі, асабліва з жанчынамі, асуджанымі ў сувязі з пратэстамі 2020 году. Мы заклікаем улады Беларусі неадкладна вызваліць гэтых жанчын, у тым ліку Вікторыю Кульшу, і забясьпечыць ім сродкі праўнай абароны, пакрыцьцё шкоды і рэабілітацыю», — гаворыцца ў заяве.
Заяву падпісалі спэцыяльны дакладчык ААН у пытаньнях правоў чалавека Нілс Муйжніекс, а таксама старшыня, намесьнік старшыні і трое сяброў Рабочай групы Рады правоў чалавека ААН у пытаньнях дыскрымінацыі ў адносінах да жанчын і дзяўчат.
ГЛЯДЗІЦЕ ТАКСАМА: Экспэрты ААН заявілі, што становішча жанчын у беларускіх турмах застаецца цяжкімУ сьвеце ня першы раз зьвяртаюць увагу на становішча беларускіх зьняволеных жанчын
26 сакавіка незалежныя экспэрты ААН у правах чалавека выступілі з заявай, у якой заклікалі ўлады Беларусі адрэагаваць на пастаянныя абвінавачаньні ў жорсткім абыходжаньні з жанчынамі ў папраўчых калёніях. Яны асабліва ўстрывожаныя станам здароўя Кульшы, які нясе пагрозу ейнаму жыцьцю.
1 траўня Эўрапейскі Зьвяз заклікаў улады Беларусі вызваліць Кульшу, «палітзьняволеную, трыманьне пад вартай якой шматкроць падаўжалі з 2020 году».
- Групу незалежных экспэртаў у сытуацыі з правамі чалавека ў Беларусі стварыла Рада ў правах чалавека ААН 4 красавіка 2024 году для расьсьледаваньня парушэньняў і ўшчамленьняў правоў чалавека ў Беларусі ў пэрыяд з 1 траўня 2020 году.
- З красавіка 2025 году на 58-й сэсіі Рады правоў чалавека ААН прынялі рэзалюцыю аб становішчы з правамі чалавека ў Беларусі і падоўжылі на 1 год мандаты дакладчыка і групы экспэртаў у пытаньнях Беларусі.