Міліцыянты не знайшлі сьведак лаянкі апазыцыянэраў

Удзельнікаў менскага сьвяткаваньня 20-гадовага юбілею Дэклярацыі аб дзяржаўным сувэрэнітэце Беларусі будуць судзіць 5 жніўня. Суд Савецкага раёну Менску сёньня адклаў слуханьні на працэсах супраць затрыманых учора апазыцыянэраў, абвінавачаных у лаянцы, бо не было сьведкаў з боку абвінавачаньня.

Чатырох апазыцыйных актывістаў — Вячаслава Сіўчыка, Андрэя Кіма, Міколу Дземідзенку і Касю Давыдзік — ўчора ўвечары затрымалі пасьля ўскладаньня кветак да помніка Якубу Коласу ў Менску. Афіцыйная прычына затрыманьня — нецэнзурная лаянка. Ноч яны адбылі ў турме на вуліцы Акрэсьціна.

Сёньня іх прывезьлі ў суд Савецкага раёну Менску. Але суды фактычна не адбыліся. Непрацяглая судовае паседжаньне распачалося толькі пас справе Касі Давыдзік. Але з-за адсутнасьці сьведкаў яе з паплечнікамі адпусьцілі на свабоду, а суд адклалі на 5 жніўня. Адзін з затрыманых, Андрэй Кім, па вызваленьні пракамэнтаваў падзеі гэтак:

"Пятнаццаць чалавек ускладаюць кветкі — каму гэта замінае? Мне падаецца, што хтосьці там працуе на разьдзіманьне скандалу, а значыць — супраць Лукашэнкі".

Андрэй Кім пра затрыманьне 27 ліпеня

Усе, хто прыйшлі да суду падтрымаць зьняволеных апазыцыянэраў, у сваіх камэнтарах зьвязвалі перасьлед актывістаў уладамі з набліжэньнем прэзыдэнцкіх выбараў. Гаворыць адна зь лідэраў Маладога Фронту Наста Палажанка, якая прыйшла падтрымаць свайго паплечніка:

"Малады Фронт звык да такіх сытуацый, і я перакананая, што гэтае затрыманьне — гэта сьведчаньне, што набліжаюцца выбары, набліжаецца новая рэпрэсіўная эпоха, да якой, безумоўна, варта рыхтавацца".

Наста Палажанка пра затрыманьні 27 ліпеня

Адзін зь лідэраў БХД Аляксей Шэін, які прыйшоў падтрымаць вязьняў у суд, абвінавачваньне супраць затрыманых учора актывістаў апазыцыі пракамэнтаваў наступным чынам:

"Тое, што людзей зьвінавацілі ў лаянцы падчас ускладаньня кветак да помніка Якубу Коласу, ужо шмат пра што кажа. А жорсткае абыходжаньне, калі вязьням не дазвалялі перадаваць ежу і рэчы, штурхалі, пашкодзілі руку Андрэю Кіму — кажа пра тое, што ўжо дадзеная нейкая адмашка і распачалася перадвыбарчая кампанія".

Аляксей Шэін пра затрыманьні 27 ліпеня

Больш за 20 моладзевых актывістаў, якія прыйшлі падтрымаць сваіх паплечнікаў у суд, заўважылі ўзмоцнены канвой арыштаваных, строгі міліцэйскі кантроль на ўваходзе ў будынак суду. Грубасьць супрацоўнікаў у цывільным маці Вячаслава Сіўчыка, спадарыня Галіна, зьведала на сабе. Каб супрацьстаяць гвалту, Галіна Сіўчык прыйшла ў суд з абразом Маці Божай і Бібліяй:

"Я ўзяла абраз Маці Божай і Біблію. Бо тое, што нашых дзяцей вінавацяць у брыдкаслоўі, то я проста хачу перапыніць паток маны. І паколькі ў нас не працуюць праваахоўныя органы, то ў мяне вельмі моцныя спадзяваньні на Маці Божую".

Вячаслаў Сіўчык пра затрыманьне 27 ліпеня